औरंगाबाद प्रतिनिधी
राष्ट्रवादी काँग्रेसचे माजी नगरसेवक, रॉक्सी सिनेमाचे मालक सलीम कुरेशी यांचा निर्घृण खून करणाऱ्या सिरीयल किलर इम्रान मेहंदीसह 8 जणांना जिल्हा व सत्र न्यायधीश व्ही. व्ही. पाटील यांनी जन्मठेपेची शिक्षा सुनावली. या खून खटल्याचा निकाल असल्यामुळे न्यायालय परिसरात तगडा पोलीस बंदोबस्त तैनात करण्यात आला होता. न्यायालयात येणाऱ्या प्रत्येकावर पोलिसांची करडी नजर होती.
राष्ट्रवादी काँग्रेसचे माजी नगरसेवक सलीम कुरेशी हे 5 मार्च 2012 रोजी रात्री रॉक्सी टॉकीजकडून घरी जात असताना त्यांचे मध्यरात्री टाऊन हॉलजवळ त्यांची कार अडवून अपहरण केले. दोन दिवसांनंतर सलीम कुरेशींची कार सिल्लेखान्यातील मुख्य रस्त्यावर आणून सोडून मारेकरी निघून गेले. बेगमपुरा पोलीस ठाण्यात सलीम कुरेशींच्या अपहरणाचा गुन्हा दाखल झाल्यामुळे तत्कालीन सहायक पोलीस आयुक्त संदीप भाजीभाकरे यांच्या पथकाने तपासाची चक्रे फिरवली. त्या कारवर उडालेली लाल माती शहराच्या परिसरात कुठे आहे याचा शोध घेतला असता ती पडेगावातील कासंबरी दर्गा परिसरातील असल्याचे लक्षात आल्यामुळे तपासाला गती देत ते सलीम कुरेशींच्या हल्लेखोरांपर्यंत पोहोचले. सलीम कुरेशींचा मारेकरी इम्रान मेहंदी यास भाजीभाकरेच्या पथकाने कटकटगेट परिसरातील घरातून अटक केली.
इम्रान मेहंदी यास अटक केल्यानंतर खुनाची मालिकाच समोर आली. सलीम कुरेशी खून खटल्याच्या तपासादरम्यान मेहंदीच्या टोळीला मोक्का लावण्यात आला. पोलिसांनी या प्रकरणाचा तपास करून न्यायालयात दोषारोपपत्र दाखल केले. या खून खटल्याची सुनावणी जिल्हा व सत्र न्यायाधीश व्ही. व्ही. पाटील यांच्यासमोर झाली असता मोक्काचे विशेष न्यायाधीश राजेंद्र मुगदिया यांनी सरकार पक्षाची बाजू मांडली. न्यायालयाने इम्रान मेहंदीसह आठ जणांना दोषी ठरवून जन्मठेपेची शिक्षा सुनावली.
संदेश
कोई टिप्पणी नहीं:
एक टिप्पणी भेजें